ភ្នំពេញ៖ បើទោះបីមមាញឹកបំពេញបេសកកម្មការងារនៅក្រៅប្រទេសយ៉ាងណាក្តី សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា មិនបានភ្លេចថ្ងៃខួបកំណើតភរិយាឡើយ ដោយនៅព្រឹកថ្ងៃទី១៥ ខែធ្នូ ឆ្នាំ២០២២នេះ សម្តេចបានបង្ហោះសារយ៉ាងផ្អែមល្ហែម ជូនពរសម្តេចកិត្តិព្រឹទ្ធិបណ្ឌិត ប៊ុន រ៉ានី ហ៊ុនសែន ក្នុងឱកាសថ្ងៃខួបកំណើតនាថ្ងៃនេះ។

សម្តេចតេជោ ហ៊ុន សែន បង្ហោះរូបថតជាមួយសម្តេចកិត្តិព្រឹទ្ធបណ្ឌិតជាច្រើនសន្លឹកជាមួយដខ្លឹមសារថា៖ «ប្រពន្ធសំឡាញ់ថ្ងៃ១៥ធ្នូនេះ ជាថ្ងៃកំណើតអូន ក្នុងពេលបងជាប្តីជាប់បំពេញការងារនៅក្រៅប្រទេស។ សង្ឃឹមថាកូនៗ និងចៅៗនឹងទៅបាយល្ងាចកំដរអូន ដែលក្នុងពេលម៉ោងនោះបងកំពុងស្ថិតនៅអាកាស។ សល់តែ២១ថ្ងៃទៀតប៉ុណ្ណោះនឹងដល់ខួប លើក៤៧ នៃថ្ងៃរៀបការរបស់យើង (៥មករា១៩៧៦-៥មករា២០២៣) ដែលពេលនោះយើងនៅក្មេងៗ ដែលខុសជាមួយពេលនេះ យើងមានចៅរហូត ២២នាក់។ សូមជូនពរលោកយាយប្រពន្ធពីចម្ងាយ»។

បើទោះបីជាសម្ដេចនៅក្រៅប្រទេស មិនបានចូលរួមកំដរភរិយាពិសារអាហារក្នុងថ្ងៃខួបកំណើត តែសម្ដេចសង្ឃឹមថា កូនៗ និងចៅៗរបស់សម្តេចនឹងទៅកំដរសម្តេចកិត្តិព្រឹទ្ធបណ្ឌិត ក្នុងឱកាសខួបកំណើតនាល្ងាចនេះ៕